दुई राप्रपाबीच माघ १८ गते एकीकरण गर्ने सहमति, राणा र लोहनी दुबैजना अध्यक्ष

एकता न्यूज / माघ १५, २०७५ - मङ्लबार


काठमाडौं– पशुपति शमशेर राणा नेतृत्वको राप्रपा प्रजातान्त्रिक र प्रकाश चन्द्र लोहनी नेतृत्वको एकीकृत राप्रपा राष्ट्रवादीबीच एकीकरण गर्ने समझदारी भएको छ ।

लोहनी र राणासहितका पदाधिकारीबीचको वार्ताबाट एकीकरण गर्ने समझदारी बनेको राप्रपा स्रोतले जनाएको छ ।

राप्रपा प्रजातान्त्रिकका प्रवक्ता राजेन्द्र गुरुङले  माघ १८ गते १ बजे राष्ट्रियसभा गृहमा एकीकरण घोषणा कार्यक्रम राखिएको पुष्टि गरे ।

यस्तै एकीकृत राप्रपा राष्ट्रवादीका सहायक प्रवक्ता जनकराज पाठकले लोहनी र राणा दुबै अध्यक्ष रहने गरी एकीकरण गर्ने समझदारी भएको रातोपाटीलाई जानकारी दिए ।

उनका अनुसार हिन्दुराष्ट्र र राजसंस्थाको मुद्दाका विषयमा ठोस धारणा बनाउन एकीकरणको एक महिनाभित्र अन्तरिम विधान तयार गरिनेछ ।

दुई वर्षअघि तत्कालिन राप्रपाबाट र राप्रपा नेपालबीच पार्टी एकता भएर कमल थापाको नेतृत्वमा राप्रपा गठन भएको भएपछि आन्तरिक खिचतानीका कारण सुरुमा लोहनी पार्टीबाट बाहिरिएका थिए भने त्यसपछि राणाले पार्टी विभाजन गरेका थिए ।

कमल थापासँग पार्टी एकीकरण अघि भने लोहनी र राणा एकै पार्टीमा थिए ।

Comment from facebook

Top